Hiep Hiep Hoera

Ich bun vandaag weer ein joar oajer gewoare. 35 jaor oad/jonk. Ich weit allein neet of ich noe bliej mot zeen vandaag of neet. Ich bun nog steeds thoes en al driej weake gein chemo gehadj. Van de eine kantj is det natuurlijk fijn mer van de angere kantj doertj ut allemoal waal lang. En aangezeen ich nog neet ins op de helf van alle chemokuure bun , bun ich doa neet zoa gelukkig mit. Alle weake diej noe oetgesteldj weare komme der aan de achterkantj van de behanjeling derbiej.

De oetstel noe is weer 2 weake. Wiej einmoal ut blood good genog woor om weer verder te goan mit kuure, haj ich allemoal ontsteakinge aan mien ongerbein. Det woor ut gevolg van jeuk en losse henj. Ich kos der neet van aafblieve en haj mich de hiel bein kapot gekratsjt. Wiej ze det in Mestreech zooge kreeg ich natturlijk drek antibiotica en weer ins ein zelfke veur de huid. Noa ein weak mos ich toen op control biej de Dermatoloog en diej goof mich weer anger antibiotica, want ze wiste waat veur bacterie diej ontsteakinge veroorzaakdje. Noa twiej pilkes bleek ich doa weer allergiesch op te reageren en bun doa dus drek mit gestoptj. De volgende daag hub ich toen mit Mestreech gebeldj en veur det de daag veurbiej woor haj ich alweer ein anger soart antibiotica in hoes. Det ging oeteindelijk good en de onsteakinge begoste get minder te weare.
Eedere daag de bein wasse mit betadine-scrub. Zalf drop en aafdekke mit pleitserkes. Mam heat good werk geleverdj, want inmiddels bun ich goodgekeurdj om mit de vervolgkuur te beginne. Ich bun noe aan ut wacht toetdet ich eine oproop krieg van ut ziekenhoes om opgenomme te weare. En den goan wer verder mit de volgende chemo kuur. Es ich nog dees weak kin beginne den bun ich mesjien net veur de kerstmis thoes.

Mer good, iers mer ins miene verjoardig viere.

De 11de van de 11de

Inmiddels is ut zoever. De 11de van de 11de. Veur mich altied eine daag om in Mestreech (en neet in ut AZM) of in Köln royaal get van det geal gerstenat noabinne te werke en de öpening van de vasteloavendj te viere. Mer noe lig ich mit barstendje koppien veur de tillevies noa de öpening op ut vriethof in Mestreech te kieke. Ich haj mich der al biej neergelag det ich de vasteloavendj dit joar zoe goan misse. Mer es ut den einmoal zoever is, den is ut toch baale.

Twiej weake geleje haj ich detzelfde geveul wiej in Ech het Limburgs Kampioensjap veur Zaate Hermeniekes plaatsvonj. Weer hajje doa mit de joekskapel de ier om de kampioensjap te öpene. Veur mich zoe det de aafsloeting zeen geweas van de organisatie van ut LKZH in 2006. Toen hubbe wer det zelf georganiseerdj. Ich haj ut prachtig gevonje om doa op det podium te stoan.

Mer good ut is noe einmoal neet zoe dit joar.

Tusse mien veurige berig en noe is der eigelik neet veul bezunjers gebeurdj. Veul noa ut ziekenhoes op en aaf gereeje om blood te laote prikke en de chemo kuur te kriege. Regelmoatig hubbe ze mich auch get blood biej gezatj omdet de hemoglobine duk te lieg woor. Verder is mien leukocytenwaarde gedaaldj toet 0,2. Eigelik extreem lieg en toch kin ich gewuen noa hoes. Doa snap ich neet veul van want wiej ich in ut ziekehoes loog mos diej waarde boave de 1,0 zeen veurdet ich noa hoes moogdje.

Aafgeloupe moandig hub ich de letste chemo gehadj van ut ierste gedeilte van de consolidatiekuur. Noe mot ich aafwachte toetdet mien blood zich weer hersteldj heaf om doanoa mit ut twiede gedeilte van de consolidatiekuur te beginne. Om te kieke of ut blood zich noa moandig hersteldj bun ich inmiddels dinsdig, woonsdig en vriedig in ut AZM geweas. Volgendje weak moandig en woonsdig hub ich auch alweer ein aafsproak stoan om ut blood te controlere. Dus ich verwach det ich urges volgendje weak goan beginne mit ut vervolg van de kuur. Ich hub van de specialist begreepe det diej in eeder geval in ut ziekehoes gegeave geit weare. En det zal ongevier 3 toet 4 weake doere veurdet ich den weer nao hoes moog.

Noe is ut dus gewuen weer aafwachte veurdet ich noa ut ziekehoes mot. Al zal det in de komendje vasteloavestied neet mitvalle. Mer mit de steun van eederein sleip ich mich doa auch waal weer doorhear.