ein gewuen griepje?

Veurige weak dinsdig (16-10-2007) bun ich aan de vervolgkuur begos. Dees kuur heatj de Consolidatiekuur. En ich bun noe bezig aan ut ierste gedeilte van dees kuur. Mit de taxi noa Mestreech, woor nog neet zoa mekkelik es dich om 9.00 op ut dagcentrum mos melje. Doa bun ich drek aan ut infuus gehange om de chemo in te laote toupe. Det ging allemoal prima. Verder kreeg ich ein spuitje in de boek mit chemo in. Diej mot ich 4 kier achterein om de 12 oer zitte. Dus hub ich mer geregeldj det ich diej mit noa hoes krieg. Doa kin ich mich die zelf zitte en det sjealtj weer ein reisje noa Mestreech.

Verder in de weak ging ut prima veul bezeuk. Get Wanjele want det ging noe auch weer goot. En vriedig bun ich zelfs op kraamvisite geweas biej Sue. Mer vanaaf ut weekend geit ut weer mis, Ich begin weer get oetslaag te kriege, en de misseklijkheid wurdj noe erg vervealendj. Mit vanalles geprobeerd om de jeuk minder te kriege mer de oetslaag blief en de jeuk aoch. Auch begin ich mich zelf steeds beroerder te veule. Den mer wachte en volhojje toet dinsdig, want den mos ich weer truuk noa Mesteech om get blood te loate prikke en ff alles te checke.

Disndig murge opgstang en ich veuldje mich versjrikkelik slech. Om 10.30 woor de taxi hiej. En op weag noa Mestreech gign ut al fout. Veur de ierste kier mos ich euvergeave. Gelukkig woor ich zoa slum en haj ich al ein plastic toet paraat. In Mestreech drek doorgeloupe noa het dagcentrum en weardje ich drek op ein bed gelag, nog steeds flink beroerdj. Oeteindelijk bleek ut blood in orde te zeen. Ut HB gehalte waas hoag genog en de wittebloedcel waarde was inmiddels weer gezaktj noa 1,0. Mit anger wurd de chemo sluit weer good aan, mer waal weer oetkieke veur infecties.
Toen om 2 oer auch nog ff ein doktor woor komme kieke kos ich weer noa hoes. Inne taxi haj ich mich mer achterin gezatj mit mam neave mich want de chafeur mos nog eemes oppikke in MEstreech. Waat eine leidesweag. Esse dich slech veuls om den hielemoal door Mestreech te kneure omdet de chaffeur neet begreeep det es de TomTom linksaaf zeatj dea auch linksaaf bedoeldj. Oeteindelijk hub ich mich in de taxi op de bank gelach en geprobeerdj get te sloape. Den haj ich in eeder geval nurges bewus las van. Thoes bun ich drek in sloap gevalle. Wiej ich wakker weardje woor ut eatestied. Ein besjuutje mit get bouillion mer neet veul later kwoom det auch alweer droet. 's aoves mer geprobeerdj om veul te drinke en toch auch nog get te eate. Biej ein besjuut en ein sultana is ut gebleeve. Om 22.00 oer noa bed mer om ein oer of 24.00 kwoom mich weer alles droet. De ganse daag geprobeerdj om get te eate en te drinke en nieks blief binne. Es det zoa de kommendje 2 weake door blief goan wurdj ut nog zwoar.

Vandaag bun ich auch nog neet veul werd. Veul gesloape mer waat ich gegeate en gedronke hub zitj der nog steeds in. Hoape det det zoa blief en det ich de kommende daag get opknap. Want ut hoof natuurlijk gein biejwerking van de chemo te zeen waat mich dwarszit. Mesjien is ut mer ein gewuen griepje?

Op noa de volgendje kuur

Sinds zaoterdig bun ich weer thoes. In mien veurig berich sjreef ich nog van 39,5 koorts en sinds dea tied is ut steeds beater gegange. De oetslaag is steeds minder gewoare en de koorts auch. Auch ut voch in de bein en erm zeen steeds minder gewoare vanaaf woonsdig. Vriedig murge woor ich veur de ierste kier weer koortsvriej. Dit is auch zoa gebleeve en doarom kos ich zoaterdig den weer noa hoes. Om 1 oer smiddigs kwoom de doctor biej mich om te zegge det ich noa hoes kos. Toen hub ich noa hoes gebeldj en ff veur 3 woor ich weer thoes.

Zoaterdig oavendj bun ich ff op ut fiesje van Anita en Mat geweas. Errug gezellug mer toch vermeujendj. Dus helaas mos ich toch al redelik vreug ut fiesgedruis verloate. Mer ut woor toch leuk om 7 weake noa de zomerboerebroelof weer ins op ein fiesje te kinne zeen.

Zunjig hub ich veul gesloape en good oetgerusj. Moandig murge alweer telefoon van Mestreech. Of ich ff blood kos komme loate prikke om de waardes ff te controlere. Mer good ffkes veltj den vies teage. Dus hub ich de taxi (ziekevervoer via CZ) gebeldj en bun ich doamit noa Mestreech gegange. Ff op en aaf om blood te prikke. Ongerhalf oer bun ich weg geweas. Taxi kosten €192,-.

Disndig begin ich den aan de vervolgkuur. De bloodwaardes zeen good dus ich mot mich murge om 9.00 oer op ut dagcentrum melje veur de volgendje chemokuur. Ein zekske chemo via ein infuus, ein spuitje in de boek en auch krieg ich murge eine ruggeprik.
Es ut good is bun ich rondj de middig weer kloar en kin ich weer noa hoes. Woonsdig mot ich auch weer noa Mestreech mer wiejlang det det geit doere weit ich neet. Verder mot ich 3 weake pille goan slikke. Ut wurdj dus noe weer driej weake aafwachte wiej mich de pille en de chemo bekomme. Ich hoap det ich der net zoa weinig las van krieg es biej de ierste kuur.

Koorts

Sinds ut weekend begin ich euveral oetslaag te kriege. Ich woor nog eigelik neet biejgekomme van ut gooj nuujs det ut beinmerg zuuver woor kriegs dit weer. zoaterdig ging ut nog mer zondig woor ut alweer ein hiel stuk erger. En noe maaktj dea oetslaag nieks oet mer dea jeuk dea doabiej heurdj is nog veul erger. Dus moandig toch mer weer noa Mestreech gebeldj. Noa 5 kier doorverbonje te zeen krieg ich den eindelik van Gelder draan. Dem alles oetgelag en oeteindelijk vroog dea. Wiejlang ich diej kuur nog moos doorslikke. Wiej ich hum verteldje det ich toet woonsdig pille haj gekreege zei der det ich den mer mit mos stoppe.

Dinsdigmiddig wool ich mien rundje door de baek goan loupe en toen merkdje ich al det get neet good woor. Ich kwoom geine meater veuroet. Dus ich hub ein korter rundje gemaaktj. Wiej ich thoes kwoom, woor ich totaal oetgeteldj. Veur de zekerheid de temperatuur gemeate. 39 grade koorts. nog ins gemeate nog steeds 39 grade. Bun ich mich goan douche en doanoa mit mentholpoejer ingestreeke om de jeuk van de oetslaag ein bietje te ongedrukke. Toen mer weer op de bank gelag onger ein dieke deake want ich kreeg weer ein koaj aanval. Riejere wiej eine gek van de koaj. Oeteindelijk toch mer weer Mestreech gebeldj en diej wolle mich drek op de Ierste Hulp zeen. Om 10 oer soaves woor ich doa. En om 3 oer snach reeje ze mich noa de aafdeiling. Doa hub ich 2 zekskes blood gekreege om det mien HB veul te lieg woor. De Leukocytewaarde woor trouwes 3 dus diej is good gesteege. Waal hiel slech gesloape omdet eeder keir die pomp van de infuus begos te piepe.

Inmiddels is ut woonsdig aovendj en lig ich nog steeds in Mestreech. 39,5 koorts haj ich net. Dus noe is ut aafwachte toetdet de koorts weg geit. Der zeen al versjillende buuskes blood aafgenomme om op kweek te zitte. En zoalang es neet duudelijk is waat veur bacterie ich in mien lief hub, krieg ich gein antibiotica. Dus veurluipig is ut weer gewuen aafwach.

Vandaag is Vandaag en Murge is Murge

Beinmerg is zuuver

Ich hub net telefoon gehadj det mien beinmerg zuuver is. Dit wiltj zegge det de eirste kuur good is aangeslaage en det ich neet veur nieks 4 weake in ut ziekenhoes hub geleage en al dea troep noa binne hub gekreege.

Ongertusse is waal weer get verangerdj in de planning van de vervolgkuur. Diej wurdj noe ein weak opgesjoave. Vannach haj ich namelijk koorts gekreege, door diej onsteaking in ut bloodvaat. 38,4 woor de temperatuur en es diej 38,5 is, mot ich drek Mestreech belle, want den wurdj ut waarsjienlijk ein enkeltje Mestreech. Om 6 oer vannach woor de temperatuur nog steeds 38,4 mer wiej ich vanmurge om 10 oer opsting woor de koorts gelukkig weg. Wiej ich det teage van Gelder verteldje wiej dea net beldje zei dea drek det ut neet verstenjig woor om mit die ontsteaking chemo te goan geave. Dus noe mot ich volgende weak vriedig blood loate prikke en es det good is zal ich die weak drop waal beginne mit de vervolgkuur.

Ut belangriekste veur noe is in eedere geval det mien beinmerg volledig vriej is van leukemiecelle. En noe hub ich auch nog ein weak langer de tied om weer op krach te komme. Det is trouwes hel neudig want det wanjele veltj nog neet mit.

Ein "rustige" weak

Hiej bun ich weer. Sinds Zaoterdig thoes in de Baek. Noa 32 daag Mestreech is ut toch eavegoot winne om weer thoes te zeen. Mot miene drej toch probeere te vinje. Mer det is mich neet ech gegundj. Sinds zondigmurge is mich ut bloodvaat woo de jugularis in zitj aan ut irritere. Waarsjienlik is ut toch goan ontsteake. Moandig veur de zekerheid ff noa de aafdeiling in Mestreech gebeldj en doa ginge drek alle belle rinkele. Kom toch mer ff noa Mestreech om noa det bloodvaat te loate kieke. Dus bun ich smiddigs weer richting Mestreech vertrokke.

Doa aangekomme werdje eine vaatchirurg gebeldj om te beoordeile of de jugularis droet mos of det der kan blieve zitte. Hea sjreef mich get antibiotica veur in de hoap det diej snel zoe werke en de jugularis kan blieve zitte. 2 uurkes later zoot ich weer in de auto op weag noa hoes.

Ongertusse hub ich waal ut bezuek van 25 neet gans mier nuchtere kermisvierders gemis. Diej woor net es eeder joar biej Heintje om 1 oer beijeingekomme om de kermis te viere. Ze hajje ein vleissjoal biej zich veur mich. Jonges inmiddels hub ich al ut ein en anger van diej sjoal op. En ut smaakdje heerlijk. Bedanktj. Volgendj joar bun ich der weer gewuen biej.

Dinsdig murge wiej ich opstong veuldje ich al det ut mit diej ontsteaking neet ech beater waas gewoare. Woor mesjien auch nog get vreug want ich haj nog neet veul antibiotica gehadj. Ich hub dus geprobeerdj neet teveul mit de linkererm te doon en te hoape det de ontsteaking minder weardje. Om 6 oer soaves geit de telefoon. Dr. van Gelder van ut AZM. Hea haj begreepe de de jugularis neet droet waas gehoaldj en det vonj der ein te groat risico. Doarom mos ich mich woonsdig in ut AZM melje om de jugularis es nog droet te hoale. Ich mos toch op woonsdig noa Mestreech veur bloodprikke en ein aafsproek biej Van Gelder. Dus det ging den in gang mit.

Woonsdigmurge veuldje ut neet good wiej ich opsting. Ich haj auch slech gesloape van de pien. Ut bloodvaat woor dus flink ontstaoke. Om kwart veur nege ging de telefoon al, ut AZM. Ich mos om kwart op tien bloodprikke, om half twelf noa de operatiekamer om de jugularis droet te hoale en om half twiej weardje den nog ein beinmergpunctie gedoan. Mit veul pien dus op weag noa Mestreech. Ut bloodprikke ging soepeltjes en snel. En toen noa de OK. Doa ging ut get langer doere. Dus wiej bleek det alles toch waal erg veul pien deej hubbe se mich doa op ein bed gelag in aafwachting van de operatie. En inderdaad om half twelf kwoome se mich hoale om dea jugularis droet te hosle. Op de OK bleek det alles zoa flink ontstoake woor det de jugularis van de pus hiel mekkelik oet ut bloodvaat gehoaldj kos weare. Toen moste ze toch nog ff vervealendj weare want de pus in ut bloodvaat mos toch auch nog ff droet geduudje weare. En zelfs mit verdauving is det gein pretje. Wiej ich einmoal van de OK aaf woor veuldje ich mich al drek ein stuk beater.

Om half twiej mos ich mich melje biej Dr. van Gelder. Dea zoe biej mich ein beinmergpunctie oetveure. Ich mot zegge det ich mich det erger haj veurgesteldj es ut oeteindelijk woor. Allein wiej op ein gegeave moment diej noaldj door ut bot hear geduudj weardje woor ein raar geveul. Om nog mer te zwiege van ut opzuuge van ut beinmerg. Tenslotte mos ich nog ein echo loate maake van ut ontstoake bloodvaat om te kieke of der gein trombose woor ontstange. En omdet mich toch nieks bespaardj blief woor det auch ut geval. Dus noe kin ich de kommendje 3 moandj spuitjes teage trombose goan zitte.

Al mit al ein bewoage weak. Inmiddels bun ich waal get aan ut wanjele om diej puddingbeinkes van mich weer ein bietje op krach te loate komme. Dus es ger eemes mit ein paars mutske euver de statieweag zeentj loupe, den bun ich det. Sjrik den neet en blief veural op de weag lette.

Murge wurdj ut auch ff spannendj. Es ut good is beldj dr. van Gelder mich murge op om de oetslaag van ut beinmerg door te geave. Haope det ut good is. Moandig mot ich bloodprikke en es mien leukocyten-waarde den boave de 2,5 is (woonsdig woor ze 1,9) mot ich mich dinsdig al weer melje op ut dagcentrum in Mestreech om de volgendje chemo-kuur te ongergoan. Dees doertj 4 weake en zal poli-klinisch oetgeveurdj weare. Doanoa zal ich weer veur ein weak of 4 opgenomme motte weare.

En nog ff veur deagene waat ut nog neet gehuerdj head. De knien van aafgeloupe zondig woor HHHHEEEERRRRLLLLIIIIJJJJKKKK.