Weblog

Noa ut bezuek en get chatte mit Anita merk ich det u waal prettig is om get dinger op te sjrieve. Kinse veur dich zelf auch alles ffkes de revu laote passeren.
Ich besloet om ein weblog op te zitte. Kan eederein alles volge en veur mich ein oetloatklep om ins alles van mich aaf te sjrieve. Ich bun benuujd wie mich det beveldj.

Om ein oer of twelf doon ich de laptop toe en de radio oet en probeer ich get te goan sloape. Mer ja mit 140 mg prednison per daag luktj det neet zoe hiel erg goot.

Onverwach bezeuk

Om ein oer of 10 komme mam en pap binneloape. Lilian mos mit eine patient noa Mestreech en pap en mam zeen ff metgereeje. Waal leuk det pap in eeder geval auch la ins hiej is gewaes. Doa kumptj weer eine doctor binne. "Alles ziet er prima uit. Bloedsuiker is ok HB is OK, Witte bloedcellen zijn aan het dalen. Eigenlijk verloopt het proces zoals gepland." Eindelijk toch ein good bericht. Dit kintj allein mer in ut veurdeil werke mit de chemo volgendje weak, HAOP ICH.

's Middigs om tien veur twie noa de auch arts. Ff de auge laote noa meate. Normaal draag ich de bril mer 10 minuut per daag mer is ich dem de ganse daag op mot hubbe is dea eigelik te slech. Loap ich de door de poli noa de augarts nieks aan de handj zoese dink. Noadet de auge gemeate zeen zit ich doa in de wachkamer toet se mich weer van de aafdeiling komme hoale. Zeen ze det vergeate door te geave. Om half driej kump toch mer ffkes eemes keike want ze wachtE al op mich om mich noa de CT-scan te bringe.

Kom ich op de aafdeiling kin ich drek ut bed in, Mondjkepke veur en weg noa de CT-scan. "Veiligheid" boave alles. Tien minute geleeje leep ich nog door ut AZM zonger get veur de mondj en rieje ze mich in ut bed door ut AZM. Wiej snel kan ut goan.

Truuk op de aafdeiling hub ich John op bezeuk. Det kiek ff hiel versjrik. Kom ich doa gans "ingesealdj" binne rieje. Mer goot dea weatj auch waat ut is om in ut ziekenhoes te ligge en op ut rendje te balanceren. Ich mot zegge det ich det bezuek hiej waal goot geregeldj vinj. Van 3 toet 8 kintj hiej eederein op bezeuk. Waal maar maximaal 2 man per kier en uiteraard gein kranke luuj mooge binne. Auch miense mit kinjer woo beveurbeeltj op sjoal de waterpokke heersj of zoa, die mooge auch neet kommen.

Ffkes laater kumt de nefroloog Dr. Kooman binnelaope. Dea kintj mich inmiddels auch al 11 jaor en hea haj geheurdj waat der aan de handj kwoom en wool toch zelf ff komme kieke. Zo'n onverwach bezeuk kan ich waal enorm waardeere. Mer goot det ich noa Mestreech bun gekomme.

Noa ut aovendjeate komme tante Rien en ome Harie op bezeuk saame mit mam. En weer get laater weare diej aafgelos door Rene, Marc en Ankie. Toch eindelik weer ffkes get sjeale zeiver droet kinne goaje. Det mot auch gebeure.

Allemoal regelkes

Noa ut ontbijt weggewerktj te hubbe goan ich mich douche. Douche mot ich mich mit betadine Shampoo en betadine Scrub. Betadine beater bekintj van de putjes jodium. Zoa ruuktj det spul trouwes auch. Noa eeder maaltijd en veur det ich noa bed goan de tenj poetsen en den "lekker" noaspeule mit ein zout oplossing. Sjeare moog ich allein mer mit ein sjearapparaat want mit de krebber kinse wundjes kriege. Neagel moog ich ach neet mier knippe auch allemoal veul te gevierlik i.v.m. wundjes.

Alles stuit in ut teiken om bacterie infecties teage te goan. Biej aankomst bleek det mien waarde van wittebloedcellen op 240 zoot. Normaal is 6. De verwachs den det dich met zo'n hoage waarde nieks kin gebeure maar van die waarde 240 werktj der geine eine tegooi. Dus bun ich hiel geveulig veur infecties en zoa.

Alles mot appaart verpaktj zeen. Ich krieg ein fles spa blauw per daag en of diej noe leag is of neet noa 24 oer wurdj diej weggegoeidj. Eate is appart verpaktj. Zelfs de sneetjes weak zeen appart verpaktj. Eate van bezeuk moog ich allemoal neet hubbe of ut mot appaart verpakt zeen, zowiej van diej mini verpakkinge. Nieks moog bewaartj weare alles waat langer es 24 aope is wurdj weggegoeidj.

Sinds vandaag krieg auch ut eate waat ich zelf hub oetgekoaze, en det veldj mich neet teage. Thoes is ut in eeder geval waal beater.



Kiek en dit bun ich noe. Mit bril. Lenze moog ich veurluipig neet in hubbe. Es ich chemo krieg den weare sneldeilende celle allemoal aafgebroake en dus auch troanvoch. Doa kriegse drueg auge van en mit lenze kinse den dien hoornvlies besjaadige mit kretskes.

De realisatie "behalve biej mich"

Noa ut aovendjeate, wat trouwes neet te prome woor, kumpt mam en Astrid op bezeuk. En eederein dea Astrid kintj wetj det det de moel toch goot biej zich heaf. Ut doert echter ff ein tied veur det dea bebbel pas los begint te komme.
Noe begin ich mich pas te realiseren det ut biej eederein hielveul impact heaf gemaaktj behalve biej mich. Ich kan der auch gein verkloaring aan geave. Miense diej mich noe hiej in bed zoewe zeen zitte zulle zich waal aafvroege waat der eigelik aan de handj is.

Noa ut bezeukoer kumptj nog eine cardioloog langs dich ich neet zoe hiel good kin verstoan omdet urges oet Azië is komme aafreize. He mos mich blood aafnumme om te kontrolere op hartenzymen. Hem zien oetlig is mich nog altied ein raodsel (hub ut laater op internet opgezog.) 's nacht om twiej oer kwoome ze mich nog ins bloodprikke.
En stief van de Prednison wear ich om half 6 weer wakker. Weer ein nag om en nog steeds nieks verangerdj. Ich veul mich prima allein de verekdjese leukemie.

Veur det ut onbijt der is wear ich al weg gebracht veur de CT-scan. Oeteindelijk den toch. Kom doa zeat zonne man teage mich "Wie ging ut drinke van de contrastvloeistof"
Ich zeg "de waat". 10 minute laater bun ich weer oppe kamer. Geine scan gehadj. Dea is versjoave noa 3 's middigs.

Toch mer de droad oppakke

Donderdig murge wear ich om 8 oer wakker gemaaktj. Ein ganse anger miens neet 100% mer 200% fitter es gister. En vervealendj maartje. Leukemie in dien lief verder geit ut allemoal goot. Nao ut ontbijt begint ut pas ech. Krieg ich noet toch nog eine scan of neet, want daoveur mot ich contrastvloestof slikke en det moch weer neet vanweage eind genetisch bepalde afwieking van ut hert (sinds 2001 pas biej mich bekint). Of moog det noe toch? Euverlik mit de cardioloog leevert nog neet drek ein antjwoard op.

Kumpt op eine gegeave moment de groate baas van de aafdeiling Dr. Span biej mich. ff vertelle. Bliek mien sokkergehalte in ut blood auch neet good te zeen. Dus noe wear ich 3 kier per daag op sokke geprikt. Verder wurd der 2 kier per daag ein ECG van ut hert gemaaktj want doe wets mer noets?

's Middigs leas ich mich den toch det fulderke van ut KWF. Of det noe vestenjig woor? Ich blief allein mer mit mier vraoge achter. Eindelik aafleijing. Anita kump op bezeuk. "Mer jong, waar maakse os den noe" en weer wurdtj ut ff stil op kamer 6 aafdeiling 5. Noa ff ut ein en anger verteld en oetgelag te hubbe, toch nog ff noa de foto's van de zomerboerbroelof kieke. "Kiek hiej zoogse der toch auch al neet te florisant oet" zeatj Anita en ich kan det allein mer bevestigge.

Acute Leukemie en waat noe ??

Acute Leukemie! Ich kwoom hiej mit ein raar geveul in de boek. Hiej reakentj toch neems op. In ut keamerke woor ut ff hiel erg stil. Ich zeg teage dea docter "En noe!? Waat goan we doa aan doon en wienier beginne wer doamit". Doa kos hae mich gein antjword op geave hae wis namelik nog neet waat veur type Leukemie ut woor en afhankelijk doavan zoe de behanjeling bepoaldj weare. Ich mos in eeder geval waal in ut AZM opgenomme weare want in de loap van de oavendj zoe bekindj zeen welk type leukemie det ut woor.

's Oaves kwoom der den auch biej mich op mien ein persoonskamer mit twiej deure in en oetzich op ut provinciehoes in Mestreech. "U heeft Acute Lymfatische Leukemie. Dit oudt in dat we eerst een week met prednison aan de slag gaan en daarna volgt de chemokuur."

Ut zei mich allemoal neet zoeveul. Ut enige woo ich ech ervaring mit hub is ut slikke van prednison, want doa hub ich in mien leave al kilo's van binne gewerktj. Der blieve allein maar hiel veul vroage euver.

Om ein oer of nege kumpt ein zuster de kamer op. Die zich de tied aafnumtj om op al mien vroage antjwoard probere te geave. Waat hub ich noe precies? Woo kumtj det vanaaf? Waat duit ein chemokuur? Waat zeen de biejwerkinge? Wielang geit det doere? Waat is de kans van slaage? Veul vroage beantjwoord en auch ein hoap neet. Mam krieg noch ein fulderke mit van ut KWF. Doa stuit precies in omsjreeve waat ut allemaol is (gebaseerd op feite, mer auch doa wurse neet ech vroolik van.")

's nachts beginne ze mich al drek blood te geave om ut te liege hemoglobine gehalte in ut blood get op te krikke. Noa twiej zekskes blood van 300 cc en get noaspeule van ut infuus bun ich sjienbaar toch om ein oer of veer in sloap gevalle.

Raar geveul in de boek

Moandig murge ein raar geveul in de boek. Nieks aan de hand. Get vervealendj want ich mot mich op pakke om noa de fysio te goan veur ein Ischias behanjeling. Biej thoeskomst duit mich alles zoeveul pien det ich mer weer drek ut bed in duuk.

Dinsdig is het raar geveul allein mer erger gewoare. Kumptj mesjien door de pien weit ich veul!? Inmiddel loap ich doa al bienoa 3 weake mit.

Woonsdig toch mer Ficken gebeldj of dea ff kin komme kieke. Doanoa de Fysio aafgebeld want ich veuldje mich nieks tegooi. Rondj de middig kumpt Ficken kieke. "Laat maar eens een CT-scan maken van je onderbuik" zeat der en verwies mich door noa de ierste hulp in Remunj. Ich zeg teage hem "Doa kintj mich neemes stuur mich mer door noa Mestreech" Dus om 14.00 oer zit ich biej de ierste hulp in ut AZM. Noa det dao eine co-assistent en eine assistent en eine chirurg mich allemaol noaein dezelfde vroage gesteldj hauwe wis ich twie oer laater nog nieks. Joa 10 buuskes blood woor ich inmiddels waal kwiet. Toen mos ich verhoeze noa ein anger kamer oppe IH. En toen kwoom eine zeekere dokter van Gelder binnen. "Hallo ik ben de bloed specialist en met uw bloed is iets niet in orde. U heeft ACUTE LEUKEMIE"