BEDANK ALLEMAOL

Veer wille uch allemaol hieël hertelik bedanke veur de meneer wo-op geer ós de aafgeloupe 8 maondj höbtj gesteuntj. Allerieërs bedanke v'r 't personeel van 't AZM in Mestreech, Hoesarts Dr. Ficken, de Thuiszorg Midden Limburg, 't ambulance personeel en verder idderein veur beveurbeeldj 't rieje nao Mestreech, ein sjouwerklöpke, ein kaart, tillefoontjes, bleumkes en neet te vergaete de kaese diej euveral gebrandj höbbe (volges ós haet half Limburg inne fik gestange)of num mer op. 'T woor eine ruggesteun veur ós, mer veural eine steun dae geer aan Rogier höbtj gegaeve. Det haet d'r zeker aan bie gedrage det Rogier haet gevochte toet op 't lès, om diej versjrikkelikke ziekte te euverwinne. Helaas 't haet neet zoea móge zeen ....
V'r wille auch idderein bedanke veur de sjoean gedinkdeens oppe dinsdigaovendj. Mit de meziek, 't laevesverhaol of allein al mit eur aanwezigheid. Auch de aafsjiedviering woor hieël sjoean, mit prachtige meziek. Precies zoea wie Rogier 't wól höbbe. Auch alle biedrages en aanwezigheid daobiej höbbe v'r zeer gewaardeerd.
De zeswaekedeens is op zóndig 29 juni óm 9.30 oere inne kèrk van 't H. Hart van Jezus inne Brachterbaek.
Dao-in zal meziek waere gebrach door de hoorngroep van fanfare Eensgezindheid.
Veer zalle noe langzaam probere óm euver dit gemis haer te kómme. 'T zal neet gemekkelik zeen mer veer zalle 't probere inne geis van Rogier : VANDAAG IS VANDAAG, MÖRGE IS MÖRGE.

Renè, Els, Lilian en Fred

P.S. Deze weblog zal nag toet nao de zeswaeke deens inne lóch zeen.

't Is gedoan.....

In mien veurige berich goof aan det de leukemie weer truuk woor. In euverlik mit ut AZM bun ich toen begos aan ein letste redmiddel om van dea leukemie aaf te komme. Vanweage de hoeage doseing mos den perse ein Hickmann Catheter ingebrach weare. Det ging al neet van herte, want det heat ongevier 1,5 oer gedoerd. Toen weer rontgen foto's loate maake of de longe nog good woore. En det woor waal nog zoa.

Dinsdig begos de kuur. 2 medicatie eedere 5 daag en 1 medicatie de ierste 3 daag. Naame bespaar ich uch want die bun ich vanaaf daag 1 auch vergeate. Van al diej 5 daag weit ich neet veul mier. Allein det ich der flink krank van bun gewaeas. Volges de specialisste woor ut sjienbaar ut zwaorste waat ze eine mins nog koste geave.

Zaterdigaovend woor de kuur aafgloupe en begos ut redelijk te goan, Auch zunjig begos ut steeds get beater te goan, toedet ich las begos te kriege van de longe en ut aodeme. Waat der aan de hand woor wiste neet mer ut zoe waal ein biejwerking van de chemo zeen.

Moandig woor ut al zoea slech det gekaldj werdje om op de InnsifCare opgenomme te waere. Hiej zoe ich den kuntsmatig beademtj weare en koste ze op her gemaak en zonger groeate riso's ongerzeuk gaon doon. Oeteindelijk hubbe zet det nog neet gedoan. Op longfoto's en ein longscan hubbe ze voch achter de longer ontdekt en kreeg drek plaspille en prednison toegedeentj om det voch aaf te drieve.

's Dinsdigs woor ut neet ech verbeated en kwoom ut ganse arsenaal aan speciaiste en ideeen weer om de hook kieke. Eine speciallist kwoom eigelijk met hut bese idee. Laote wer iers ins ein beinmergpunktie doon om te kieke of de kuur waal gehoalpe head. Dus loog ich 'smurges om 11 oer al kloar en woor de beinmergpunkte al op weag noa ut lab. Ein paar spannendje oere zoe aanbreake, want normaal doert zo'n ongerzeuk ein paar oer. Mer sneller es wer gedach hajje kwoom Dr. van Gelder ut nuuts euverbringe det der wittebloodcelle in ut beinmerg aanwezig woore en die waat der woore auch allemoal fout zeen.

't is gedaon...... geer kintj nieks mier veur mich doon.

Op de vroag wielang ich den nog te leave hub mos ich eede dinke aan weake den moandje. Ich hub toen auch aan gegeave zosnel meugelijk noa hoes te wille. En ich mot zegge detze det op aafdeiling snel geregeld hubbe


En dus bun ich noe de letste daag of weake van mien leave toes aan ut probeere te geneete. Ich bedank eederein van aafdeilg A5 van ut AZM veur heure tommeloze inzit de ze mich gesjonke hubbe. Verder bedank ich eederein dea in al dea tied veur mich kloar hubbe gestange op bezeuk zeen gewaas en geschreeve in waat veur vorm den auch. Verder bedank ich ein paar knotsgekke vrouwluuj veur heur biedrage in het verwerke van dees ziekte

Mer toet slot bedank ich Mam Pap Lilian en Fred veur heur steun en geluif in mich om dit alles toet ein good inj te bringe.
helaas ut is is mich neet gelukt 't is gedoan..... Rogier Pex'



P.S. Dit is auch teves mien letste stukske op mien weblog. Luuj bedank

Hielemoal mis

Ich hub vanmurge te huere gekreege det de oetslaag van de beinmergpunktie van gister hielemoal neet good woor. Mit anger wurd de leukemie is weer truuk. Volges de specialist dus ein zeer hardnekkige vorm. Ut sjema waat ich dus aan ut volge woor geit noe van toafel en doaveur kump ein nuuj behanjling in de plaats. Dit heltj in det ich moandig opgenomme wear in ut ziekehoes en det ich om half 2 op de OK eine jugularis ingebrach krieg. Dinsdig begint den de nuuj chemokuur. Diej zal 2 kier 4 weake doere. De chemo waat ich goan kriege weit ich nog neet precies mer ut zal in eeder geval mit hoeage dosering gebeure.

Beinmerg kloar om te ongerzeuke

2 weake noa dees behanjeling krieg ich den weer ein beinmergpunktie en den zal blieke of dees nuuj kuur waal heat aangeslaage. Garanties weare der uiteraard neet gegeave mer de kans van slaage woor in eeder geval neet groeat. Moch toch blieke det ut beinmerg zuuver is, den zal der gezog goan weare noa eine donor en zal ich in Rotterdam ein transplantatie ongergoan.

De specialist vroog mich of ich dees nuuj behanjeling wol aangoan. Woo op ich vroog of ich ein keus haj. Specialst "Ja die is er"

Ich hub toch mer joa gezag.

Ich bun los

Eindelijk. Ich bun los. Sinds 29 januari hub steeds ein infuus in de erm gehadj en om det ich doa redelijk geveulig veur woor kreeg ich regelmoatig ontsteaking aan de bloodvaten. Dus mos eeder kier ut infuus op ein anger plaats gezatj weare. op 11 versjillendje plaatse hub ich ein infuus gehadj en veurnamelijk in de rechtse erm.
Dus bun ich noe erg bliej det ich eindelijk los bun, gein infuus mier.

De antibiotica hub ich toet 1 april thoes gehadj. Auch dea is noe gestoptj. En de chemo kuur woo ich mit bezig woor, de Intensification 1B fase, is inmiddels auch aafgeloupe. Ich bun vandaag truuk noa ut AZM geweas veur ein beinmergpunktie mer die is neet doorgegange. De bloodwaardes woore te lieg, en dus hub ich waal nog weer ein zekske blood biejgezatj gekreege. Noe mot ich volgendj weak woonsdig truuk veur ein nuuj poging veur de beinmergpunktie.

Det heltj waal in det de volgendje kuur weer get op geit sjuuve, want diej zoe eigelik op 9 april starte. Hub ich waal weer get mier tied om mien conditie op piel te bringe. Ich hub vandaag al ein flink stuk in ut ziekehoes geloupe, mer den merk ich toch det ut van ver mot komme. Dus murge mer ins eine fysio belle om te kieke waat ich ut beste kin doon om zoea snel meugelijk get conditie te kriege. En es mien blood verder in orde blief mot det toch redelijk snel weer get beater mit mich goan.
En es noe ut wear auch nog ein bietje mitwerktj komtj ger mich vas en zeker weer op de stroat teage es ich aan ut wanjele bun.

Weer bezig mit ein chemokuur

Hiej bun ich weer. En dit kier bun ich weer thoes. Sinds vriedig bun ich weer truuk in de Beak. Inmiddels weite ze nog steeds neet woorom det ich de veurige kier noa Mestreech bun motte goan. Der is neet duudelik gewoare woo de koorts vanaaf is gekomme. Inmiddels bun ich waal weer begos mit de vervolgkuur. (Intensification 1B 21 daag)


Es ut good is kin ich diej gewuen poliklinisch aafmaake. Ich mot den volgende weak en diej weak drop eine kier noa ut ziekehoes veur ein infuus mit chemo en de res doon wer zelf. Get spuitjes zitte in de boek en pille slikke. De antibiotica hub ich auch nog steeds. Dea mot ich toet ut einde van de moandj blieve gebroeke.

Veurluipig geit ut good en ich hoap det det auch zoa blief. Kin ich mesjien auch weer ins get aan mien conditie goan doon, want doa is werkelik nieks mier van euver.

Ziekewaage

Ff ein kort berich vanoet Mestreech. Joawaal Mestreech. Sinds donderdig 6 miert lik ich weer in Mestreech. Half 5 hub ich dr. Ficken gebeldj thoes det ut neet good geit. En om kwart veur 5 loog ich in de ziekewaage. Hiej aangekomme op de ierste hulp woor ut lang wachte. Iers ging ut infuus droet want det woor ontstoake. En drek doanoa eine nuuj infuus in de linkererm. Toen oeteindelijk noa aafdeiling D5 kamer 8. Vriedigs bun ich verhoesj noa aafdeiling A5 kamer 6. Ein einpersoons kamer (ein klein bietje op mien aandringe).

Inmiddels is ut moandig. Ut infuus is weer droet en noe hub ich weer ein nuuj in de rechtererm. Verder weite ze neet woo de koorts van donderdig vanaaf kwoom en oet de blood- en urinekweeke van donderdig woor auch nieks te zeen. Verder bun ich nog waal get misselijk en mot regelmoatig get euvergeave. Noe is ut dus weer aafwachte waat geit gebeure. Eigelijk stuit veur murge de vervolgkuur gepland mer of diej door geit is auch nog ff aafwachte.

Eindelijk thoes

Sinds moandigoavendj bun ich weer thoes. Alles is in ein sneltreinvaart gegange. Veurige weak donderdig hub ich tiedes de visite van de doktore aangegeave det ich ut neet mier volheel, veural geestelijk en det ich gewuen noa hoes wol. Vanaaf det moment zin der ein aantal doktore biejeingoa zitte om te kieke waat meugelijk woor. Ein dink sting vas. Ich mos nog 4 weake antibiotica kriege via ein infuus. En nog 4 weake ziekehoes woor toch ech gein optie.

Toen zeen ze vriedig mit de thuiszorg, apotheek, en de hoesarts goan belle waat veur meugelijkheden det der wooore. En doa woor der idd. ein. Hieeveur mos de apotheek zurge det der de spuite mit antibiotica dagelijks kloar zoe maake. Verder mos de hoesarts garant stoan veur de zurg rondjom ut infuus. Mog doa get mit misgoan den mot ich de hoesarts kinne belle om ein nuuj infuus te zitte. Toet slot mos de thuiszorg der veur zurge det eine kier per daag die spuit out die pomp verwisseldj wurdj. Op diej maneer krieg ich 24 oer per daag antibiotica. Verder is der ein bed geregeld want mien krachte zeen zoever aafgenomme det ich bliej bun es noa de wc bun geweas en weer truuk in bed lik. en loat stoan ein trap oploupe det geit gaaroet neet.

Vriedig woor den alles geregeld en kos ich moandig noa hoes. Eindelijk weg oet det ziekehoes. Om 4 oer hub ich nog ein zekske antibiotica gekreege en toen gouw noa hoes. Mit ome Sjra ziene auto truuk noa de beak. Ich kan uch vertelle det wiej ich hiej de kamer inleep ich iers ein flink putje hub zitt janke. Al dea ealenj van de aafgloupe weake sjoat mich door mien gedachte, en noe eindelijk thoes. Heerlijk.

inmiddels bun ich alweer 2 daag hoes. Tis allemoal ff winne mer det kump waal good. Ichzelf veul mich nog neet alles. Den geit ut good en den geit ut minder mer det zal waal door de antibiotica komme. Bun bliej det ich in eeder geval thoes bun. Det is noe ut belangriekste.

Ut besef

Hiej bun ich weer. Ut heaf ff gedoerdj veurdet ich get gesjreeve hub mer det heat zoa zien reaje.

Ich bun inmiddels kloar mit de chemokuur van dit gedeiltje van de bahanjeling. Eigelik mot ich zegge det diej goot verloupe is. Probleem is echter det ich sinds de donderdig noa de vasteloavendj weer las hub van ein bacterie-infectie. Dezelfde bacterie woo ich eeder auch las van hub gehadj. Door ein ontstoakebloodvaat woo mien infuus in zoot is die bacterie noe auch in mien blood en maag dermkanaal terech gekomme. Ut gevolg woor det mien spiere weer hielemoal laamgelag zeen en ich ein paar dag nieks mier kos. Verder bun auch al ongerhalf weak aan de diaree.

Mien energie nivo is dus vriej slech en alle kos hiel veul meujte. Zitte, laupe, noa de WC goan, alle dinge diej veur eederein normaal zeen kos mich enorm veul krach en energie.

Mer waat ich mich de afgeluope daag nog ut meiste gerealiseerdj hub is det ich ech serieus krank bun. Sinds ut begin van mien behanjeling noe 176 daag geleeje hub ich wiej raar ut auch klink redelijk good doorstange. Mer noe veul ich mich ech krank van de behanjeling. Veur ut iers det ich mich det realiseer, en det ich doa hiel moeilijk mit om kin goan. De aafgeloupe daag hub ich doa auch gestelijk en mentaal veul meujte mit gehadj. Regelmoatig hub ich zitte janke en te prakkezere wiej noe verder. En mit de steun van de miense diej op bezeuk kwoome bun ich doa auch waal weer oetgekomme. Mer ut blief nog steeds ein hiel erge emotionele periode veur mich.

Auch noe mit die bacterie infectie. Ich merk det ich der meujte mit hub neet zelf ut tempo van herstel te kinne bepaole. Ich hub der auch gein zich op wielang det dit nog allemoal geit doere. Sinds ein weak hub ich gein chemo mier dus de bloodwaardes zeen zich weer aan ut hertelle en ich hoap det mit det herstel auch die bacterie-infectie get sneller onger controle kumpt. Waat mien lichaamlijke herstel nog geit doere weit ich neet mer volges de fysio is ut neet get van ein paar weake.

Mit anger wurd. Veur ut iers besef ich det ich nog hiel lang te goan hub en det ich der nog lang neet bun. En det zal gepaardj goan mit veul downs en ich hoep mit ein paar zeer waardevolle ups. En aaf en toe ins allein of mit eemes anges ins flink oetjanke lucht ech op. Auch veur Rogier Pex

Vasteloavendj saame

Ut is vasteloaveszondig. Eine daag woo altied toch eedere vateloavesvierder noa oetkiekt. Ut begin van de driej doll daag, auch al zeen sommige noe al driej daag aan de gang. Vanmurge wiej ich wakker weardje en noa boete keek begos ut toch te kriebele. Lekker wearke, fein optoch laupe vanmiddig en den goan fieste. Mer helaas. Ich sloan mer ins euver dit joar.

Hub gister uiteraard noa de zoepkoel gekeeke en esse den ut volgendje op de televies veurbiej zuus komme den wurdj ut hertje biej mich toch auch waal hiel erg klein. Sjatjes bedankt.

Inmiddels hub ich gister auch weer get chemo gehadj. Det ging neet zoea soepel. Sjienbaar woor ut infuus neave ut bloodvaat terecht gekomme en wiej ze alles veurdet de chemo draan kwoom ff alles ginge doorspeule kreeg ich eine ganse bultj op mien erm. Ut infuus lekdje. Dus mos der op ein anger plaats ein infuus gepriktj weare. Mer sjienbaar woor det neet zoea eenvoudig want doa hubbe ze eine doktor veur motte zeuke dea doa toch get mier henjigheid in haj. Oeteindelijk hub ich den noe ut infuus aan de linkse erm. Bietje vervealendj omdet ich linkshenjig bun mer ut is noe einmoal neet anges.

Vanaaf noe krieg ich om de angerste daag chemo toet 13 februarie en den bun ich mit dees kuur kloar. Zal den nog waal eine daag of 5 doere veurdet ich den noa hoes moog. Mer det zeen wer den waal weer.

Auch lik ich weer op ein anger kamer. Kamer 16 is ut gewoare. Ich mos mit miene buurman weg van kamer 22 omdet ze doa de ganke en nog ein deil anger kamers van ein nuuj vloer goan veurzeen. Noe lik ich mit 4 miense woavan de res neet zoa positief allemoal is. Dus es ger verhulkes hubt of get sjeale zeiver. SMS Mail of MSN den hub ich auch get te lache.

Gister hub ich waal nog ein ongersjeiing gekreege van CV De Sjwenskes oet Sjweikese (Zwijkhuizen). Mien buurman (van kamer 22 en noe nog steedss) is lid van diej carnavalsvereniging en diej woore biej dem op bezeuk en wiej ze huerdje det ich eine ex-prins woor kreeg ich spontaan ein ongersjeiing.

Mer good, ich goan weer aafsloete en op internet en televies probeere get van de vasteloavendj mit te kriege. Ich wins eederein vanmiddig eine fijne optoch en maak der ein sjoan fies van.

Bienoa carnaval

Es ich dit sjrief lig ich weer veur ein kuur in ut ziekehoes van Mestreech. Dit kier is ut die 1ste kuur vsn de Intensificatie-Fase I. Ich hub veur de duudelikheind ein klein sjema gemaaktj. Hiejin is aangegeave woo ich urges in de behanjeling zit. De cijfers zeen de daage det de kuur doertj. Det zeen dus neet de daag die ich in ut ziekenhoes lik. Det kan per kuur versjille. Sommige lik ich gedeiltelik in ut ziekehoes en mit sommige kuure bun ich weer thoes.


Inmiddels is ut woonsdig half 12 en hub ich nog steeds gein infuus. Volges zuster Myrthe mot ein middel waat biej dees kuur gebroektj wurdj oet Duitslandj komme en det is mit eine koerier ongerweag noa Mesteech. Dus mer weer wachte (doa raakse hoas aan gewindj).

Sinds mien veurige berich is der eigelik neet veul verangerdj. Ich hub waal de ierste weak noadet ich thoes bun gekomme versjrikkelikke koppien gehadj. En noe heur ich veul miense dinke, dieke kop dus veul pien, mer det woor ut neet. Ut woore van die steeke, veural es ich mos neeste of hooste. Ut vervealendje woor eigelik det ich doarom lestig op alles en eederein woor. Ich hub auch bienoa ein weak lang nieks gezag. Vermoedelik woor det ut gevolg van de ruggeprik.

Op 10 januari bun ich noa ut ziekehoes geweas veur ein beinmergpunktie. Diej ging neet zoa soepel. Mer oeteindelijk woor ut waal geluktj. 's Daags dernoa beldje de specialist al op det alles good woor en det ut beinmerg auch zuuver woor. Verder zoe der doorgeave det ich opgenomme kos weare veur de vervolgkuur. En toen begos ut lange wachte, en det head toet gister gedoerdj.

Noe mot ich waal zegge det ich mich in deij weake toch neet ech vervealdj hub. Ich bun mit de oad prinse noa de receptie van Prins René III van MCV de Hoonder geweas. Verder bun ich noa de receptie van Prins Frank I en Prinses Kay van CV Onger 't Viaduct geweas. Ich bun noa ut carnavalsconcert van fanfare Eensgezindheid goan loestere. En ich bun noa ut Plus Schulpen Boetengewoan Beerkratzitte geweas.


Noe mot ich waal zegge det ich biej de receptie van de hoonder en onger 't viaduct op tied weer weg bun gegange. Op ein of anger meneer kin der neet mier teage es ut te druk begintj te weare. Ich hoap det det waal weer truuk kumtj es alles achter de ruk is.

Door de weak hub ich mich auch neet vervealdj. Ich bun get beij vrunj en vriendinne thoes goan koffiedrinke, en biej kleine Siem op kraamvisite geweas. En ich hub auch 2 wedstrijde gebiljart, mien ierste wedsrijde dit seizoen. Eine gewonne en eine verlaore. Mer waal good gespeeldj, ruum boave mien gemiddeldje.

Noe ich hiej lik merk ich toch det ich ut waal vervealendj goan vinje det ich dit joar gein carnaval kin goan viere. Mer ondanks det wins ich eederein sjoan vasteloavesdaag toe. Ich hub begreepe de ut koad geit weare dus doontj uch allemoal goot aan, want krank weare kan eigelik neemes gebroeke. Toch!?

P.S. Ich lik op kamer 22 afdeiling A5. En bezeuk uiteraard weer via Mam regele.